හුදකලාව

සුද්දි ...... 

මාස දෙකකට සැරයක් අප්පච්චීගේ මහ ගෙදරට යාමේ පුරුද්දක් මට තිබුනා. බාප්පා එක්ක තනියම ඉන්න ආච්චි අම්මා හිටියේ මන් එනකල් බලාගන. ගාල්ල ස්ටේෂන් එකෙන් බැහැලා ඉමදුව බස් එකෙන් කදුරුදූව හන්දියෙන් බැහැ ගන්න පුලුවන්. මන් බස් එකෙන් බහිනකොටත් හවස හය පහු වෙලා කලුවර වැටිලා.පුරුද්දට වගේ හන්දියේ කඩෙන් කඩල පැකට් එකක් අරන් මග දිගට කකා ගියා. මන් යනකොටත් ආච්චි අම්මා දොරකඩ බලන් ඉන්නවා. අප්පච්චීගේ මහ ගෙදර ගොඩක් පරණ තාලේ වලව්වක්. ටිකක් පාලූ ගතියයි. අපේ ගෙදරට යමු කියලා අප්පච්චී කොච්චර කිව්වත් එයා මේ ගෙදර දාලා යන්න සූදානම් නෑ.

"අනේ අම්මපා උස් මහත ලමිස්සියන්ට ගොම්මන් වෙලාවේ පුලුටු කකා පාරවල්වල තනියම එන්න හොදයිද? සුද්දිට වෙච්ච් දේ දන්නවනම් උබලා ඔහොම වෙන්නෙ නෑ"

මං ඇග සෝදාගෙන එනකොටත් ආච්චි අම්මා බත් බෙදාගෙන බලන් ඉන්නවා.

"මොකක්ද ආච්චි අම්මා අර සුද්දිගේ කතාව?"

"ආ ඒක ගොඩක් පරණ කතාවක් කෙල්ලේ. අපි උබලාටත් වැඩිය පොඩී මගේ හිතේ. අපේ ගමේ හිටියා සුද්දි කියලා අක්ක කෙනෙක්. ඇග පත පිරිච්චි ලස්සන ගැණී. කාලයක් රෑට රෑට සුද්දි අක්කලාගේ ගෙදරින්  හූ කියලා මර ලතෝනි තියන සද්දයක් ඇහෙනවා. අපේ අම්මලා ඔක්කොම දුවන් යනවා. ඒ තමයි එකිට කලු කුමාරයා වැහිලා කියලා ගමේ මිනිස්සු කිව්වෙ. "

කලු කුමාරයා තමයි ගෑනුන්ට, වීශේෂයෙන් අලුතින් වැඩිවියට පත් වෙච්ච ගෑනු ලමිස්සියන්ට තනි මංවලදී හෝ සීනෙන් හෝ පෙනී දිෂ්ට් හෙලා ලෙඩ රෝග පමුණුවන යක්ෂයා ය. කලු පාට   දැකුම්කළු අයෙක්. රට යකුම් යාගයටත් ආරාධනා තියෙනවා මේ කලු කුමාරයාට. මීමෙකු පිට නැගි නාගයෙක් ඔතාගෙන ඉන්නවා කියලා තමයි මිනිස්සු කියන්නේ. ගම්මු කියන විදියට කලු කුමාරයාට අවතාර හතක් තියෙනවා. හඳුන් කුමාර,අඳුන් කුමාර , මල් කුමාර, ගිරි කුමාර, දළ කුමාර,සොහොන් කුමාර,වාත කුමාර කියලා.කොහොමින් කොහොම හරි සුද්දි අක්කා කොන්ඩේ කඩාගන ලිඳට ගිහින් තියනව ගොම්මන් වෙලාවේ. එකත් කැවුම් කෑල්ලක් කටේ දාගෙන.

ඉතින් කොහොමහරි අවසානේට සුද්දි අක්කාට තනියම නිදාගන්නවත් බැරි උනා. සුද්දි අක්කගේ ඇඳ ගාව කලු පාට මනුස්සයෙක් හිටන් ඉන්නවා වගේ පේනවලු. සුද්දිට ඇලේට හැරිලා නිදාගන්නවත් දුන්නේ නෑලු. අවසානෙට සුද්දිගේ අම්මලා සුද්දිගේ ඇඳට සරමක් එහෙමත් දාලා තියෙනවා. ඔය මොනවා කරත් වැඩක් නැති හින්දා ගුරුන්නාන්සේ කියලා තියෙනවා ඉලන්දාරියෙක් හොයලා කසාද බන්ඳලා දාන්න කියලා. එතකොටත් සුද්දිට පලහිලව්වක් තිබිලා තියෙනවා ගමේ හිටිය සියාතු කියන මනුස්සයා එක්ක.     සියාතු හරි ඔතෑනි මිනිහා. මිනිහා මිනිහගේ පාඩුවේ ඉන්නවා. ඒ හින්දා සියාතුගේ ගෙදරින් සුද්දිට කැමති උනා. සියාතුට වෙන ගෑණියක් කැමති  වෙන්නෙ නැති හින්දා. අනික සුද්දිගේ ගෙදරින් කැමති උනෙත් සුද්දිගේ මේ දෝෂේ අහල ගම් හතම දන්න හින්දා. සියාතුටත් හරියන්නම සියාතුගේ මල්ලි සයිමන් හරි විසේ කාරයා.      ඒ කසාදේ උනා මතකයි මට.
                       
                              ට්ක කාලයක් ගියාට පස්සෙ ආයේ සුද්දිට ලමයි නෑ කියලා ගමේ කතා උනා.වඳ ගෑණි කියලා මිනිස්සු හරියට කතා හැදුවා. සුද්දිගේ නැන්දම්මා සියාතුටත් හරියට දොස් කිව්වා මූසල ගෑනියක්ට කර ගැහුවා කියලා. කලු කුමාරයා ගෑනු වඳ කරනවලුනේ. දේවාල ගානේ ගියාට පන්සල් ගානේ ගියාට ලමයි හම්බ උනේ නෑ. අවසානෙට සුද්දිගේ අම්මලට සුද්දිගේ නැන්දම්මා කියන කතා  අහගන ඉන්න බැරිම තැන රට යකුමක් නැටුව

                               දිෂ්ට් හෙළා කතුන් හා ළදරුවන් ලෙඩ රෝගවලට ගොදුරු කරගන්නා මෙන්ම ගෑනු වඳ කරගන්නා යක්කු තමයි රට යක්කු. ඔවුන්ගේ නායිකාව තමයි රිද්දි බිසව. ඇය නිතරම ඉන්නේ තවත් බිසෝවරු එක්ක. මේ බිසෝවරු රිද්දි බිසව් සත් කට්ටුව කියලා තමයි හඳුන්වන්නෙ. මේ වඳ බිසෝවරු හත් දෙනා තමන්ගේ වඳභාවය නැති කරගන්න දීපංකර බුදුන්ට තමන්ම වියපු නොඉඳුල් සලුවක් පූජා කරන්න ඔනේ බවත් ඉන් වඳභාවය දුරු වී ගැබ් ගන්නා බවත් තමයි  රිද්දියාගයෙන් පෙන්නුම් කරේ..
                  කොහොමෙන් කොහොමහරි අවසානෙට සුද්දිට රට යකුමකුත් නැටුවා. ටික දවසක් යනකොට සුද්දිට ලමයෙක් හම්බ වෙන්න කියලා ගමේ පැතිරුණා. රිද්දියාගයෙ ප්‍රතිඵල කියලා මිනිස්සු කතා උනා. අවසානෙට සුද්දිට ලස්සන කොල්ලෙක් හම්බ උනා. මාත් ගියා අම්මලත් එක්ක බලන්න. ගමේ මිනිස්සු කතා උනේ ඇරපු අතක් නෑ බාප්ප වගේ කියලා. මිනිස්සු ඕක කියන වාරයක් ගානේ සුද්දිගේ නැන්දම්මා ආයේ සුද්දි එක්ක රණ්ඩු වෙනවා. ඔහොම ඉදලා සයිමන්ගේ කසාදේ ඉක්මන් කරා සුද්දිගේ නැන්දම්මා. කසාදේට දවස් දෙකක් තියලා සුද්දී සයිමනුයි ලමයයි අතුරුදන් උනා. ඔන්න ඔහොමයි උනේ. පස්සෙ තමයි තේරුනේ සුද්දිට ලමයා හම්බ උනේ කොහොමද කියලා. පස්සෙ අරංචි උනා සුද්දිලා අනුරාධපුර පැත්තේ ඉන්නවා කියලා.
             ඔහොමයි සුද්දිගේ කතාව. රට යකුමෙන් ලමයා හම්බ උනා කියලා සුද්දි තමන්ගේ මිනිහවයි ගමයි රැවැට්ටුවා.

"කලු කුමාරයා පවුලකට කරපු හදියක් තමයි ඔය. ඒක තමයි මන් උබලාටත් කට කැඩෙනකල් කියන්නෙ ලමිස්සියෝ පරෙස්සම් වෙන්න ඔනේ මිනිස්සුන්ගෙන් විතරක් නෙවෙයි කියලා"
                               එහෙම කියලා ආච්චි අම්මා නැගිටලා ගියා. රට යකුමේ ඇත්ත නැත්තනම් ඕනේ පොඩි එකෙක්ට තේරුනාට මේ කලු කුමාරයාගේ කතාවේ ඇත්ත නැත්ත මට තේරුම් ගන්නත් අමාරුයි. ඔවා ජීවිතේට මන් විස්වාස කරලා නෑ. එහෙම හිතෙනවත් එක්කම ආපූ සීතල හුළඟට අනියත බයක් ඇති වෙලා මන් ආච්චි අම්මා ලගට දිව්වා. ඒ කියන්නේ ආච්චි අම්මා කියපු කතාව මගේ හිතේ පොඩි හරි බලපෑමක් ඇති කරලා කියලා.....



        (ගම්මුන් අතර ප්‍රචලිත කලු කුමාරයා සහ පහතරට ශාන්තිකර්මයක් වන රිද්දියාගය යන සංකල්පය පදනම් කරගෙන මෙම කෙටිකතාව ලියැවී ඇත.)

                          Hs/2015/0381
                          U.H ජයරත්න